ភ្នំពេញ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានលើកឡើងថា «អាស៊ាន គឺជាសក្តានុពលដ៏អស្ចារ្យនៃវប្បធម៌ ភាសា និងប្រពៃណី ហើយការប្តេជ្ញាចិត្តរួមគ្នាក្នុងការកសាងអនាគតដ៏ល្អប្រសើរសម្រាប់តំបន់របស់យើង គឺជាការរួបរួមគ្នារបស់យើង»។
លោកស្រី ភឿង សកុណា លើកឡើងបែបនេះក្នុងឱកាសអញ្ជើញជាអធិបតី ក្នុងពិធីអបអរសាទរទិវាអាស៊ាន លើកទី៥៦ នៅល្ងាចថ្ងៃទី៧ ខែសីហា ឆ្នាំ២០២៣ ដោយពិធីនេះមានការចូលរួមពីភ្ញៀវកិត្តិយសជាតិ-អន្តរជាតិ និងបណ្តាអង្គទូត ក៏ដូចជាសិស្ស និស្សិតជាច្រើនរូបផងដែរ។
លោកស្រីបានសម្តែងសេចក្តីសោមនស្សរីករាយដែលបានស្វាគមន៍ចំពោះការចូលរួមអបអរសាទរទិវាអាស៊ានលើកទី៥៦ និងថ្លែងថាការរួមគ្នាបង្កើតសហគមន៍រឹងមាំ និងធន់ ដែលត្រូវបានដឹកនាំដោយគោលការណ៍នៃការគោរពគ្នាទៅវិញទៅមក សាមគ្គីភាព និងការទទួលខុសត្រូវរួមគ្នា។
ជាមួយគ្នានេះ លោកស្រី ភឿង សកុណា បានបញញចាក់ថា ក្នុងក្របខណ្ឌដ៏ទូលំទូលាយ និងប្រកបដោយចក្ខុវិស័យសម្រាប់អនាគតនៃកម្ពុជា ចក្ខុវិស័យសហគមន៍អាស៊ានឆ្នាំ២០២៥ គឺបង្ហាញពីសេចក្តីប្រាថ្នារបស់កម្ពុជាក្នុងការសម្រេចបាននូវសហគមន៍នយោបាយស្អិតរមួត សមាហរណកម្មសេដ្ឋកិច្ច និងសង្គមដែលមានទំនួលខុសត្រូវ ដោយផ្តោតលើប្រជាជន។
រដ្ឋមន្ត្រីក្រសួងវប្បធម៌ និងវិចិត្រសិល្បៈរូបនេះក៏បានលើកឡើងពីសារៈសំខាន់នៃវប្បធម៌ដែលជាធាតុសំខាន់នៃអត្តសញ្ញាណ និងសហគមន៍អាស៊ាន។ លោកស្រីមានប្រសាសន៍ថា៖ «វប្បធម៌មិនត្រឹមតែជាប្រភពនៃមោទនភាព និងសេចក្តីរីករាយសម្រាប់ប្រជាជនរបស់យើងប៉ុណ្ណោះទេ ប៉ុន្តែវាក៏ជាកត្តាជំរុញនៃទំនាក់ទំនងសង្គម និងការអភិវឌ្ឍសេដ្ឋកិច្ចផងដែរ»។
ក្នុងឱកាសនោះដែរ លោកស្រី ភឿង សកុណា បានរម្លឹកឡើងវិញនូវការប្តេជ្ញាចិត្តរបស់កម្ពុជាក្នុងការលើកកម្ពស់ភាពចម្រុះនៃវប្បធម៌ និងការថែរក្សាបេតិកភណ្ឌរួមរបស់កម្ពុជា ដោយគូសបញ្ជាក់ថា៖ «ចូរយើងធ្វើការរួមគ្នាដើម្បីធានាថាវប្បធម៌ដ៏សម្បូរបែប និងចម្រុះរបស់យើងត្រូវបានបញ្ជូនបន្តទៅមនុស្សជំនាន់ក្រោយ ហើយពួកគេបន្តជំរុញ និងលើកកម្ពស់ជីវិត»៕